ପେଡାଲ ଚାଳିତ ନିରାପଦ ହାତଧୂଆ ସାନିଟାଇଜର ଯନ୍ତ୍ର

      

           ଏବେ କୋରୋନା ଭାଇରସର ସଂକ୍ରମଣରୁ ରକ୍ଷା ପାଇବା ପାଇଁ ହାତଧୂଆ ସାନିଟାଇଜରମାନ ବହୁଳ ବ୍ୟବହୄତ ହେଉଛି I ବ୍ୟକ୍ତିଗତ ସ୍ତରରେ ଏହାକୁ ବ୍ୟବହାର କରିବା ସେତେଟା ବିପଦପୂର୍ଣ୍ଣ ନୁହେଁ  I ମାତ୍ର ବ୍ୟାଙ୍କ , ଅଫିସ କିମ୍ବା ସର୍ବସାଧାରଣ ସ୍ଥାନଗୁଡିକର ଗୋଟିଏ ସାନିଟାଇଜରକୁ ଅନେକ ଲୋକ ବାରମ୍ବାର ବ୍ୟବହାର କରିବା ଦ୍ବାରା ସଂକ୍ରମଣ ବ୍ୟାପିବାର  ଆଶଙ୍କା ରହିଥାଏ I ଏହି ପରିପ୍ରେକ୍ଷୀରେ ଏପରି କିଛି ସରଳ ସାନିଟାଇଜର ବିକଶିତ କରାଯାଇଛି ଯାହାକୁ ବିନା ହାତ ସଂସ୍ପର୍ଶରେ ଚାଳନା କରିହେବ  I ଏହା ଦ୍ବାରା ସଂକ୍ରମଣର ସମ୍ଭାବନା ବହୁ ପରିମାଣରେ ହ୍ରାସ ପାଇଥାଏ I

          ଏହି ବ୍ୟବସ୍ଥାରେ ଯନ୍ତ୍ରର ତଳଭାଗରେ  ଏକ ପେଡାଲ ସ୍ଥାନିତ ଥାଏ I ବ୍ୟବହାରକାରୀ ପେଡାଲକୁ ଗୋଡରେ ତଳକୁ ଦବାଇଲେ, ପେଡାଲ ସହିତ ସଂଯୁକ୍ତ  ଏକ  ଲମ୍ବା ( ଦୈର୍ଘ୍ୟ: 2 ରୁ 3 ଫୁଟ) ଭୂଲମ୍ବ ଦଣ୍ଡ ଉର୍ଦ୍ଧ୍ବକୁ ଗତିଶୀଳ ହୁଏ I ଏହା ଉପରିଭାଗରେ ଏକ କ୍ଷୁଦ୍ର ଭାରଦଣ୍ଡ ସହିତ ସଂଯୁକ୍ତ ଥାଏ  I ଭୂଲମ୍ବ ଦଣ୍ଡର ଅଗ୍ରଭାଗ ଭାରଦଣ୍ଡର  ଗୋଟିଏ ପ୍ରାନ୍ତ ଉପରେ ('ବଳ' ପ୍ରାନ୍ତ ଉପରେ) ଏକ ଉର୍ଦ୍ଧ୍ବମୂଖୀ ବଳ ପ୍ରୟୋଗ କରେ I ଏହାଦ୍ବାରା ଆଲମ୍ବ ଉପରେ ଆଧାରିତ ଭାରଦଣ୍ଡର ଅନ୍ୟ ପ୍ରାନ୍ତଟି (ଭାର ପ୍ରାନ୍ତଟି) ନିମ୍ନ ଦିଗରେ  ଗତିଶୀଳ ହୁଏ I ଏହି ପ୍ରାନ୍ତ ତଳେ ସାନିଟାଇଜର ବୋତଲକୁ ରଖାଯାଇଥାଏ I ଭାରଦଣ୍ଡର ଭାର ପ୍ରାନ୍ତଟି ନିମ୍ନ ଦିଗରେ  ଗତିଶୀଳ ହୋଇ ବୋତଲର ଠିପିରେ ଲାଗିଥିବା ସାନିଟାଇଜର ତରଳର  ନିର୍ଗମ ନଳୀକୁ ତଳକୁ ଚାପି ଦିଏ I  ଫଳରେ ସାନିଟାଇଜରର ଯନ୍ତ୍ରର  ନିଜସ୍ବ ବ୍ୟବସ୍ଥା ଅନୁଯାୟୀ କିଛି ସାନିଟାଇଜର ତରଳ ପଦାକୁ ବାହାରି ଆସେ I ଏହାକୁ ବ୍ୟକ୍ତି ଜଣକ ବ୍ୟବହାର କରି ହାତ ସଫା କରନ୍ତି   I  ସେହିପରି, କାର୍ଯ୍ୟ ସରିଗଲେ, ବ୍ୟବହାରକାରୀ ପେଡାଲ୍ ଉପରୁ ଚାପ ପ୍ରୟୋଗ ପ୍ରତ୍ୟାହାର କରି ନିଅନ୍ତି I ଫଳରେ, ପେଡାଲ ସହିତ ସଂଯୁକ୍ତ ଭୂଲମ୍ବ ଦଣ୍ଡଟି ତଳକୁ ଗତିଶୀଳ ହୁଏ I ଏହା ସଂଯୁକ୍ତ ଭାରଦଣ୍ଡକୁ କାର୍ଯ୍ୟକାରୀ କରି ସାନିଟାଇଜର ବୋତଲର ନିର୍ଗମ ପ୍ରାନ୍ତ ଉପରୁ ଚାପ ପ୍ରତ୍ୟାହାର କରେ I ଏହାଦ୍ବାରା ବୋତଲ ମଧ୍ୟରୁ ସାନିଟାଇଜର ତରଳ ବହାରିବା ସମ୍ପୂର୍ଣ୍ଣ ବନ୍ଦ ହୋଇଯାଏ I

       ଏହି ବ୍ୟବସ୍ଥାଟି ସରଳ ଯାନ୍ତ୍ରିକ ପଦ୍ଧତି ଉପରେ ପର୍ଯ୍ୟବେସିତ ହୋଇଥିବାରୁ ଏହାକୁ ସହଜରେ  ପ୍ରସ୍ତୁତି କରାଯାଇପାରେ I ଏହାର  ଚାଳନା ନିମନ୍ତେ ବିଦ୍ୟୁତ  କିମ୍ବା ପେଟ୍ରୋଲ ଭଳି କୌଣସି ଇନ୍ଧନର ଆବଶ୍ୟକତା ପଡେ ନାହିଁ I ଏଭଳି ବ୍ୟବସ୍ଥାକୁ  ସ୍ବଳ୍ପ ଖର୍ଚ୍ଚରେ  ନିର୍ମାଣ କରାଯାଇ ପାରିବ ଏବଂ ଏହାର ରକ୍ଷଣାବେକ୍ଷଣ  ମଧ୍ୟ ସହଜ. I ଏହା ମଧ୍ୟ ପରିବେଶପ୍ରିୟ୍ ଓ ପ୍ରଦୂଷଣ ବିହୀନ I ସୁତରାଂ ଏଭଳି ସାନିଟାଇଜର ବ୍ୟବସ୍ଥାର ପ୍ରୟୋଗ ଦ୍ବାରା ସର୍ବସାଧାରଣ ସ୍ଥଳୀରେ କୋରୋନା ସଂକ୍ରମଣର ସମ୍ଭାବନା ଆଶଙ୍କାକୁ ବହୁଳ ପ୍ରତିହତ କରାଯାଇ ପାରିବ I

 

                                                                                                               ନିକୁଂଜ ବିହାରୀ ସାହୁ      

                                                                                                               ଏଜୁକେଶନ୍ ଅଫିସର

                                                                                                              ଆଂଚଳିକ ବିଜ୍ଞାନ କେନ୍ଦ୍ର

                                                                                                                                    ଭୋପାଲ